“Sakkizta urushni tugatdim, yana biri yaqin” — Tramp
AQSH prezidenti orada yana bir qurolli mojaroga chek qo‘yishni kutayotganini aytdi.
Tramp 7-oktyabr kuni Oq uyda jurnalistlar bilan suhbatda sakkizta urushni tugatganini daʼvo qilib, “yana biri kelayotganini” maʼlum qilgan. Biroq u qaysi mojaro to‘qqizinchi bo‘lishini aniq aytmagan.
AQSH prezidenti Nobel tinchlik mukofoti haqida ham gapirib, mukofotni olgan yoki olmaganidan qatʼi nazar, avvalgi laureatlardan ko‘ra ko‘proq ish qilganini taʼkidlagan.
Tramp Norvegiya Nobel qo‘mitasi unga mukofot bermasa, bu qo‘mita uchun obro‘ga putur yetkazishini aytgan. U, shuningdek, 2009 yilda Nobel tinchlik mukofotiga sazovor bo‘lgan sobiq prezident Barak Obamani tanqid qilgan. Tramp Obama mukofotni prezidentligining boshida olganini va nima sababdan unga berilganini o‘zi ham bilmaganini daʼvo qilgan.
AQSH prezidenti avval ham Ukrainadagi urushni tez orada yakunlashga umid bildirgan. Biroq 7 oktyabrdagi bayonotida u “yana bir urush” haqida gapirgan bo‘lsa-da, aynan qaysi mojaro nazarda tutilayotganiga aniqlik kiritmagan.
