“Umra”ga yuborish evaziga 1 100 dollar: Farg‘onada turfirma xodimi ushlandi
U tegishli litsenziyasiz 4 nafar fuqaroni ziyoratga yuborish uchun 4 400 dollar talab qilgan.
Farg‘ona viloyatida tegishli litsenziyaga ega bo‘lmagan holda “Umra” ziyoratini tashkil etishga uringan turfirma xodimi ushlandi.
Davlat xavfsizlik xizmatining Farg‘ona viloyati bo‘yicha boshqarmasi xodimlari viloyat Ichki ishlar boshqarmasi bilan hamkorlikda tezkor tadbir o‘tkazdi.
Tadbir davomida Dang‘ara tumanida faoliyat yurituvchi turfirma xodimi tegishli litsenziyaga ega bo‘lmasa-da, 4 nafar fuqaroni “Umra” ziyoratiga yuborishni tashkil etishga uringani aniqlangan.
U buning evaziga fuqarolardan jami 4 400 AQSH dollari talab qilgan. Shaxs 1 100 AQSH dollarini olgan vaqtida ashyoviy dalillar bilan ushlangan.
Maʼlum qilinishicha, ayrim sayyohlik firmalarining belgilangan tartib-qoidalarga rioya qilmagan holda “Umra” safarlarini tashkil etishi fuqarolarning xorijda turli qiyinchiliklarga duch kelishiga sabab bo‘lishi mumkin.
Mazkur holat yuzasidan turfirma xodimiga nisbatan jinoyat ishi qo‘zg‘atilgan. Hozirda tergov harakatlari olib borilmoqda.
