Ukrainaga yangi prezident kerak — Tramp
U Zelenskiyni urushni tugatishga intilmayotganlikda aybladi.
AQSH prezidenti Donald Tramp Ukraina urushni yakunlash bo‘yicha kelishuv tuza oladigan yangi yetakchini saylashi kerakligini aytdi. U, shuningdek, Ukraina prezidenti Volodimir Zelenskiyni Rossiyaning neftni qayta ishlash zavodlariga berilgan zarbalar uchun tanqid qildi. Bu haqda BBC xabar berdi.
“Men Ukrainaga kelishuv tuza oladigan yangi yetakchini topishini taklif qilaman. Zelenskiy ko‘plab kelishuvlarga erishishi mumkin edi, biroq unday qilmayapti”, — dedi Tramp.
Qayd etilishicha, AQSH prezidenti Rossiya neftni qayta ishlash zavodlariga qilingan hujumlar dizel yoqilg‘isi narxining oshishiga ta'sir qilganini ta’kidladi. Shuningdek, u Zelenskiyni urushni tugatishga intilmayotganlikda bilvosita ayblagan.
Tramp Vashington Kiyevdan Rossiya neftni qayta ishlash zavodlariga hujumlarni to‘xtatishni so‘raganini ham tasdiqladi.
“Biz Zelenskiyga: ‘Xohlaganingni qil, lekin dizel yoqilg‘isi ishlab chiqarish obyektlariga zarba berma’, dedik. U esa nima qilyapti? Borib, aynan shu obyektlarga zarba beryapti. U istagan ishini qilishi mumkin, ammo buni emas”, — dedi Tramp.
