Pekin qarib bormoqda: 2035-yilga kelib aholining uchdan biri 60 yoshdan oshadi
2025-yil oxirida shaharda bu yosh guruhiga mansub 5,29 million kishi yashagan.
Beijing Daily nashrining xabar berishicha, 2035-yilga kelib Pekin aholisi orasida 60 yoshdan oshganlar ulushi 33 foizdan yuqori bo‘lishi prognoz qilinmoqda. Bu shaharni demografik jihatdan «super qarigan» metropol maqomiga olib kelishi mumkin.
Ma’lumotlarga ko‘ra, 2025-yil oxirida Pekinda 60 yoshdan oshgan 5,29 million kishi yashagan. Bu shahardagi doimiy aholining 24,3 foizini tashkil etgan.
Aholining qarishi ortib borayotgan sharoitda Pekin ma’muriyati keksalarni qo‘llab-quvvatlash choralarini kuchaytirmoqda. Jumladan, asosiy pensiya to‘lovlarini oshirish va keksalarga xizmat ko‘rsatish infratuzilmasini rivojlantirish rejalashtirilgan.
Xitoyda aholi soni 2022-yildan buyon qisqarib, demografik qarish jarayoni tezlashmoqda. Bu holat mamlakat iqtisodiyotiga, jumladan, ichki iste’molning o‘sishi va pensiya tizimining barqarorligiga ta’sir ko‘rsatmoqda.
Reuters hisob-kitoblariga ko‘ra, Xitoy hukumati 2026-yilda tug‘ilish darajasini oshirish dasturlariga jami 180 milliard yuan — taxminan 26,92 milliard dollar sarflashi kutilmoqda.
