“Mojaroning markazida Donbass masalasi turibdi” — Rubio

 

AQSh Davlat kotibi Marko Rubio Ukrainadagi mojaroning davom etishiga sabab bo‘layotgan asosiy masalalardan biri Donbass hududining Ukraina nazoratidagi qismi bo‘yicha kelishmovchiliklar ekanini bildirdi. Bu haqda u Breitbart nashriga bergan intervyusida aytgan.

 

Rubioning so‘zlariga ko‘ra, Ukraina Donbassning o‘z nazoratida qolgan qismini tark etishni istamaydi, chunki bu hudud mudofaaning muhim chizig‘i hisoblanadi.

 

“Ukraina: «Biz Donbassning qolgan 11 foizidan voz kecha olmaymiz, chunki bu bizning so‘nggi mudofaa chizig‘imiz», deydi. Demak, mojaroning markazida shu masala turibdi. Boshqa ko‘plab muammolar ham bor, ammo oxir-oqibat, urushni aynan shu masala belgilamoqda”, — degan Rubio.

 

Davlat kotibining ta’kidlashicha, tomonlar o‘rtasidagi kelishmovchiliklar tinchlik muzokaralarini murakkablashtirmoqda. Uning fikricha, urushni tugatish bo‘yicha sa’y-harakatlar olib borilayotganiga qaramay, asosiy masalalarda murosaga erishish qiyinligicha qolmoqda.

 

Rubio, shuningdek, Ukrainadagi saylovlar masalasiga ham to‘xtalgan. Uning aytishicha, saylovlar muhim bo‘lsa-da, ular urushning davom etishiga sabab bo‘layotgan asosiy muammolarni hal qilmaydi.

 

Ma’lumot uchun, Ukrainada 2022-yil fevralida boshlangan keng ko‘lamli urush sababli harbiy holat joriy etilgan. Ukraina qonunchiligiga ko‘ra, harbiy holat davrida prezident va parlament saylovlarini o‘tkazish taqiqlangan. Shu sababli 2024-yilda o‘tkazilishi rejalashtirilgan prezident saylovi ham bo‘lib o‘tmagan.