YPX xodimiga bo‘ysunmadi va haqorat qildi: talabalar ishi prokuraturaga oshirildi
Samarqandda YPX xodimining to‘xtash haqidagi talabiga bo‘ysunmay, uni haqorat qilgan texnikum o‘quvchilari aniqlandi.
Samarqand viloyatining Ishtixon tumanida YPX xodimining qonuniy talabiga bo‘ysunmay, uni haqorat qilgan shaxslar aniqlandi. Ma’lum bo‘lishicha, ular Kattaqo‘rg‘on tumanidagi 2-sonli texnikum o‘quvchilari bo‘lgan.
Huquqbuzarlik ishtirokchilarining aytishicha, ular “Malibu-2” avtomobilini 1,2 million so‘mga ijaraga olib, Ishtixon tumaniga borgan. U yerda YPX xodimlari avtomobilni to‘xtatishni talab qilgan, biroq yoshlar bu talabga bo‘ysunmay, harakatni davom ettirgan va xodimlardan qochib ketgan. Shuningdek, ular YPX xodimini haqorat qilgan harakatlarini videoga olib, ijtimoiy tarmoqlarga joylashtirgan.
Holat aniqlangach, huquqbuzarlik sodir etgan o‘quvchilar, avtomobilni ijaraga bergan tadbirkor hamda ularning ota-onalari ta’lim muassasasiga olib kelingan. Tuman hokimi, prokurori, ichki ishlar bo‘limi boshlig‘i va boshqa mas’ullar ishtirokida holat tanqidiy muhokama qilingan.
Yig‘ilishda o‘quvchilar o‘rtasida bunday huquqbuzarliklarning oldini olish, yo‘l harakati xavfsizligini ta’minlash va shu kabi holatlar takrorlanishiga yo‘l qo‘ymaslik masalalari ko‘rib chiqilgan.
Videoda o‘quvchilardan biri qilgan ishidan pushaymonligini bildirib, YPX xodimlari va ularning oilalaridan uzr so‘ragan. Shuningdek, haydovchilik guvohnomasini olmaguncha avtomobil boshqarmasligini aytgan.
Holat yuzasidan to‘plangan hujjatlar qonuniy qaror qabul qilish uchun prokuratura organlariga yuborilgan.
