Toshkentda qizamiq xavfi ortdimi? Rasmiy munosabat bildirildi
Ijtimoiy tarmoqlarda qizamiqqa gumon qilingan 290 ta holat va bemorlar bilan aloqada bo‘lgan 10 mingdan ortiq shaxs ro‘yxatga olingani haqida xabarlar tarqaldi.
Sanitariya-epidemiologik osoyishtalik va jamoat salomatligi qo‘mitasining Toshkent shahar boshqarmasi poytaxtda qizamiq keskin tarqalayotgani haqidagi xabarlarga munosabat bildirdi.
Ijtimoiy tarmoqlarda Toshkent shahrida qizamiq bilan kasallanishga gumon qilingan 290 ta holat aniqlangani va bemorlar bilan aloqada bo‘lgan 10 mingdan ortiq shaxs ro‘yxatga olingani haqida xabarlar tarqalgan edi.
Qo‘mita ma’lumotiga ko‘ra, hozirda Toshkent shahri va mamlakatning boshqa hududlarida qizamiq bo‘yicha epidemiologik vaziyat barqaror. Tarqalgan raqamlar 2026-yilning dastlabki to‘qqiz oyidagi jamlanma ko‘rsatkichlarni aks ettiradi. Shu sababli ularni qisqa vaqt ichida yuz bergan kasallanish holatlari yoki ayni paytdagi vaziyat sifatida talqin qilish noto‘g‘ri.
Shuningdek, 2026-yilning shu davrida qizamiq bilan kasallanish ko‘rsatkichi 2025-yilga nisbatan 40 foizga kamaygan.
Qo‘mita fuqarolarni ijtimoiy tarmoqlardagi ma’lumotlarni to‘g‘ri talqin qilishga va tasdiqlanmagan xabarlarni tarqatmaslikka chaqirdi.
Ma’lumot uchun, 2026-yilning dastlabki to‘qqiz oyida Toshkent shahrida rejali emlash doirasida 47 494 nafar bir yoshli va 42 767 nafar olti yoshli bola qizamiq, epidemik parotit va qizilchaga qarshi KPK vaksinasi bilan emlangan.
