“AQSHga murojaat qilgan edik”: Eron TIV O‘zbekistonning norozilik notasiga javob berdi

 

Eron Tashqi ishlar vazirligi rasmiy vakili Ismoil Baqoiy Samarqandning tarixiy-madaniy merosiga oid bahsli postlar hamda O‘zbekiston TIV tomonidan topshirilgan norozilik notasiga izoh berdi. Uning aytishicha, ayrim Eron elchixonalari tomonidan ijtimoiy tarmoqlarda e’lon qilingan postlar AQSHga murojaat sifatida yozilgan.

 

Ismoil Baqoiyning ta’kidlashicha, Eron va O‘zbekiston o‘rtasidagi munosabatlar uzoq tarixga ega va Tehron bu aloqalarga katta ahamiyat beradi.

 

U ikki mamlakatni bog‘lab turuvchi umumiy meros xalqlar o‘rtasidagi do‘stona munosabatlarni davom ettirish va mustahkamlashga xizmat qilishiga ishonch bildirgan.

 

Shuningdek, Eron TIV vakili ayrim diplomatik vakolatxonalar tomonidan e’lon qilingan, O‘zbekiston tomonining e’tiroziga sabab bo‘lgan postlarga ham to‘xtalgan.

 

“Ayrim elchixonalarimizdagi do‘stlarimiz o‘z postlarini AQSH tomoniga murojaat sifatida e’lon qilishgan edi”, — degan u.

 

Eslatib o‘tamiz, 23-oktyabr kuni Eronning O‘zbekistondagi elchisi Muhammad Ali Iskandariy O‘zbekiston Tashqi ishlar vazirligiga chaqirilib, unga rasmiy norozilik notasi topshirilgan edi. Bunga Eronning bir qator davlatlardagi elchixonalari X ijtimoiy tarmog‘ida Samarqandning tarixiy-madaniy merosini biryoqlama va siyosiy mazmunda talqin qiluvchi postlar e’lon qilgani sabab bo‘lgan.

 

O‘zbekiston TIV Samarqand, Buxoro va Xiva kabi tarixiy shaharlar merosi o‘zbek xalqining ko‘p asrlik tarixi va davlatchilik an’analarining ajralmas qismi ekanini ta’kidlab, tegishli postlarni o‘chirish hamda kelgusida bunday holatlarga yo‘l qo‘ymaslikni talab qilgan.

 

Bahs AQSH davlat kotibi Marko Rubioning Samarqandga tashrifi va Registon maydonidan e’lon qilgan videomurojaatidan keyin yuzaga kelgan. Eronning ayrim diplomatik vakolatxonalari bunga javoban Samarqand me’morchiligini fors yoki Eron-islom sivilizatsiyasi merosi bilan bog‘lovchi postlar joylashtirgan.

 

Ma’lumot uchun, Eronning turli davlatlardagi elchixonalari tomonidan Samarqand haqida e’lon qilingan postlar keyinchalik o‘chirib tashlangan.