“Dunyo ishonch inqirozi davriga kirdi” — Toqayev
Qozog‘iston prezidenti xalqaro huquqning ahamiyati pasayishi va BMT obro‘si bilan bog‘liq muammolarga e’tibor qaratdi.
Qosim-Jomart Toqayev dunyoda global qarama-qarshiliklar kuchayib, yirik davlatlar o‘rtasidagi o‘zaro ishonch inqirozi chuqurlashayotganini bildirdi. Bu haqda u mamlakat xalqiga yo‘llagan yillik murojaatida ma’lum qildi, deb xabar berdi Kazinform.
Davlat rahbarining aytishicha, bugungi kunda davlatlar o‘rtasida o‘zaro ayblovlar va yashirin qarama-qarshiliklar kuchaymoqda. Shu bilan birga, xalqaro huquqning ahamiyati pasayib, Birlashgan Millatlar Tashkilotining obro‘si bilan bog‘liq muammolar yuzaga kelmoqda.
Toqayev nazoratsiz migratsiya oqimlari ham ortib borayotganini qayd etib, bu holat ayrim Yevropa mamlakatlari xavfsizligiga jiddiy ta’sir ko‘rsatganini ta’kidladi.
“Bugungi kunda davlatlar o‘rtasida asossiz o‘zaro ayblovlar va yashirin qarama-qarshiliklar kuchayib bormoqda, yirik va nufuzli kuchlar o‘rtasida chuqur o‘zaro ishonch inqirozi yuzaga keldi”, — dedi Qozog‘iston prezidenti.
Uning fikricha, zamonaviy dunyo noaniqlik va beqarorlik davriga kirgan. Toqayev hozirgi xalqaro vaziyatni murakkab va oldindan aytish qiyin bo‘lgan holat sifatida ta’riflab, hatto Sovuq urush davrida ham bunday vaziyat kuzatilmaganini aytgan.
Shuningdek, prezident Qozog‘iston mustaqilligi va suverenitetini himoya qilish bilan bog‘liq masalalar hali to‘liq hal etilmaganini ta’kidladi. Uning so‘zlariga ko‘ra, mamlakat oldidagi muammolarni hal qilish, islohotlarni amalga oshirish va taraqqiyotga erishish uchun jamiyat birligi muhim ahamiyatga ega.
“Birlik va kelishuvsiz hech qanday islohotlar yoki taraqqiyot bo‘lmasligi mutlaqo aniq”, — dedi Toqayev.
