Tailandga 15 kun vizasiz kirish: O‘zbekiston ham ro‘yxatda
Mamlakat rasmiylari viza rasmiylashtirishdagi kechikishlarni bartaraf etish va sayyohlar oqimini oshirish uchun uchta davlat fuqarolariga vizasiz rejim taklif qilmoqda.
Tailand rasmiylari O‘zbekiston, Kolumbiya va Meksika fuqarolari uchun 15 kunlik vizasiz rejim joriy etishni taklif qilmoqda. Tashabbus viza rasmiylashtirishdagi kechikishlarni bartaraf etish va uzoq masofadan keladigan sayyohlar oqimini oshirishga qaratilgan.
The Nation nashrining Tailand Turizm va sport vazirligiga tayanib xabar berishicha, tegishli taklif 9-noyabr kuni Viza siyosati qo‘mitasi yig‘ilishida ko‘rib chiqilishi rejalashtirilgan.
Tailand Turizm va sport vaziri Meksika va Lotin Amerikasining boshqa mamlakatlaridan keladigan sayyohlar viza rasmiylashtirishdagi kechikishlarga duch kelayotganini tasdiqlagan.
Nashr ma’lumotlariga ko‘ra, Emirates aviakompaniyasi Meksikadan uchadigan ayrim reyslarda yo‘lovchilar Tailand vizalarini o‘z vaqtida ololmayotgani sababli muammolar yuzaga kelganini bildirgan. Har bir reysda 20–30 nafargacha yo‘lovchi viza bilan bog‘liq muammolar tufayli safarga chiqa olmagan.
O‘zbekistonlik sayyohlar uchun ham tartib soddalashishi mumkin
Tailand rasmiylari O‘zbekiston fuqarolari ham elektron viza olish jarayonida qiyinchiliklarga duch kelganini qayd etgan. Xususan, viza rasmiylashtirish tartibi murakkabligi sababli ayrim mahalliy sayyohlik agentliklari Tailandga mo‘ljallangan sayohat paketlarini bekor qilib, Vetnam kabi boshqa yo‘nalishlarni taklif qilishga majbur bo‘lgan.
Tailand tomoni taklifni amalga oshirishdan oldin uning xavfsizlik va iqtisodiy oqibatlarini ham baholaydi.
