“Amerikaning yengilmasligi haqidagi afsona yo‘qoldi” — Xomanaiy

 

Eron oliy rahbari Oyatulloh Mojtabo Xomanaiy AQShdagi saylovlardan keyin mamlakat tashqi siyosatida o‘zgarishlar kutmaslik kerakligini bildirdi. Bu haqda Tasnim axborot agentligi uning so‘zlariga tayanib xabar berdi.

 

Xomanaiyning ta’kidlashicha, AQSh siyosatida partiyalar yoki siyosiy guruhlar almashishi Eron xalqiga nisbatan munosabatni o‘zgartirmaydi. U Vashington bilan kelishuvga erishish yoki unga yon berish orqali AQShning Eronga nisbatan dushmanligini to‘xtatish mumkin deb hisoblaydiganlar yanglishayotganini aytgan.

 

Eron oliy rahbari AQShning Eronga nisbatan siyosati tarixiy voqealar, jumladan, 1953-yil avgustida bosh vazir Muhammad Mossadiq hukumati ag‘darilgan davrdan boshlanganini ta’kidlagan. Uning so‘zlariga ko‘ra, AQSh 1979-yilgi Islom inqilobigacha Eronning tabiiy resurslari va kapitalidan foydalangan, keyinchalik esa 1980–1988-yillardagi Eron-Iroq urushida Iroqni qo‘llab-quvvatlagan, Eronga qarshi sanksiyalar joriy etgan va mamlakat aktivlarini muzlatgan.

 

Xomanaiy, shuningdek, Hurmuz bo‘g‘ozi atrofidagi vaziyat “Amerikaning yengilmasligi haqidagi afsonani yo‘qqa chiqarganini” bildirgan. Uning ogohlantirishicha, AQSh Eronga yana hujum qilgan taqdirda, Tehronning javob choralari ancha keng ko‘lamli bo‘ladi.

 

Uning fikricha, Vashingtonning asosiy maqsadi Eronni to‘liq taslim qilishdan iborat. Xomanaiy Qarshilik ko‘rsatish o‘qi harakatlarini esa yangi dunyo tartibiga olib boradigan yo‘l sifatida ta’riflagan.