Jamoatchilik noroziligiga sabab bo‘lgan video: Nilufar Hamidova 7 sutkaga qamaldi
Aktrisaning ko‘cha va bekat atrofida tasvirga olgan videosi ijtimoiy tarmoqlarda keskin noroziliklarga sabab bo‘lgandi.
5-noyabr kuni jinoyat ishlari bo‘yicha Yunusobod tumani sudida 1978-yilda tug‘ilgan aktrisa Nilufar Hamidovaga nisbatan ma’muriy huquqbuzarlik to‘g‘risidagi ish ko‘rib chiqildi. Bu haqda Toshkent shahar sudlari xabar berdi.
Sud qaroriga ko‘ra, Hamidova Ma’muriy javobgarlik to‘g‘risidagi kodeksning 183-moddasida nazarda tutilgan mayda bezorilikni sodir etganlikda aybdor deb topilgan. Unga 7 sutka ma’muriy qamoq jazosi tayinlangan.
Avvalroq aktrisaning ko‘cha va bekat atrofida tasvirga olgan videosi ijtimoiy tarmoqlarda tarqalib, jamoatchilik noroziligiga sabab bo‘lgan edi. Shundan so‘ng ichki ishlar organlari holat yuzasidan surishtiruv o‘tkazib, uning xatti-harakatlariga huquqiy baho bergan.
IIB xodimlari bilan suhbatda Hamidova jamoatchilikdan uzr so‘ragan va bunday mazmundagi videolarni boshqa tayyorlamasligini bildirgan. Keyinchalik unga oid ma’muriy ish hujjatlari sudga yuborilgan.
Ma’lumot uchun, Hamidova avval ham ijtimoiy tarmoqlardagi chiqishlari sababli «O‘zbekkonsert» davlat muassasasi tomonidan litsenziya talablari va shartlariga rioya etish yuzasidan ogohlantirilgan.
