Misrda poyezdlar to‘qnashdi: yetti kishi halok bo‘ldi
Fojia oqibatida 114 kishi jarohatlangan.
2026-yil 8-noyabr kuni Misrning Giza gubernatorligidagi El-Ayyat shahri yaqinida ikkita yo‘lovchi poyezdi to‘qnashdi. Hodisa oqibatida yetti kishi halok bo‘ldi, 114 kishi jarohatlandi. Bu haqda TASS mamlakat Sog‘liqni saqlash vazirligi va mahalliy OAV ma’lumotlariga tayanib xabar berdi.
Dastlabki ma’lumotlarga ko‘ra, Gizadan Fayumga ketayotgan 134-sonli poyezd Qohiradan Asvanga yo‘l olgan 2010-sonli poyezdning oxirgi vagoniga urilgan. To‘qnashuv natijasida bir nechta vagon relsdan chiqib ketgan.
Gubernatorlik prokuraturasi ma’lumotiga ko‘ra, halok bo‘lganlar orasida poyezd mashinisti ham bor. Qurbonlar soni bo‘yicha yakuniy ma’lumotlar aniqlashtirilmoqda.
