Mast holda rulga o‘tirishning oqibati: o‘zbekistonlik erkak 15 sutkaga qamalishi mumkin
Shuningdek, Qozog‘istonda qo'lga olingan erkak 7 yilga haydovchilik huquqidan mahrum etilishi mumkin.
Qozog‘istonning Atirau shahrida mast holda transport vositasini boshqargan haydovchilar, jumladan, O‘zbekiston fuqarosi aniqlandi. Bu haqda Atirau viloyati politsiya departamenti ma’lum qildi.
Qayd etilishicha, huquqni muhofaza qilish organlari xodimlari “Xavfsiz shahar” tezkor-profilaktik tadbiri davomida mast holda avtomobil boshqarish bilan bog‘liq birinchi holatni aniqlagan.
Ikkinchi qoidabuzarlik esa “Migrant” dasturi doirasida o‘tkazilgan reydlar chog‘ida qayd etilgan. Tekshiruvda O‘zbekiston fuqarosi avtomobilni mast holda boshqarayotgani aniqlangan.
Har ikki haydovchiga nisbatan ma’muriy bayonnomalar rasmiylashtirilib, to‘plangan hujjatlar tegishli qaror qabul qilish uchun sudga yuborilgan.
Qozog‘iston Ma’muriy huquqbuzarliklar kodeksining 608-moddasiga muvofiq, mast holda transport vositasini boshqarish 15 sutkaga ma’muriy qamoq va 7 yil muddatga transport vositasini boshqarish huquqidan mahrum etish bilan jazolanishi mumkin.
