“Ukraina biroz boshqacha bo‘ladi” — Tramp
AQSh prezidenti Rossiya va Ukraina o‘rtasidagi tinchlik kelishuvidan so‘ng Ukraina kelajagi haqida gapirdi.
Donald Tramp Rossiya va Ukraina o‘rtasidagi tinchlik kelishuvi yaqinlashayotganini aytdi. Uning ta’kidlashicha, urush yakunlanganidan keyin Ukraina “biroz boshqacha holatda” bo‘ladi. Biroq u bu bayonotiga batafsil izoh bermagan.
Tramp bu haqda CBS News telekanaliga bergan intervyusida ma’lum qilgan.
“Men bu urush tugashiga ishonaman va u tez orada tugaydi. Uning yakunlanishining yagona sababi men tufayli bo‘ladi. Menimcha, biz bunga erishamiz va hammasi yaxshi bo‘ladi”, — degan AQSh prezidenti.
Uning fikricha, tomonlar o‘rtasida tinchlikka erishish yo‘lidagi asosiy to‘siqlardan biri Ukraina prezidenti Vladimir Zelenskiy va Rossiya prezidenti Vladimir Putin o‘rtasidagi kelishmovchilik va o‘zaro ishonchsizlikdir.
Trampning bayonoti 10–11-noyabr kunlari Abu-Dabida AQSh, Rossiya va Ukraina vakillari ishtirokida o‘tkazilishi rejalashtirilgan uch tomonlama muzokaralar arafasida yangragan.
Kreml ma’lumotiga ko‘ra, muzokaralarda xavfsizlik kafolatlari, keskinlikni kamaytirish va Ukraina mojarosini hal etish masalalari muhokama qilinadi. Shuningdek, gumanitar masalalar hamda tinchlikka erishish yo‘lidagi keyingi qadamlar ko‘rib chiqilishi kutilmoqda.
