Qirg‘izistonda prezidentlik saylovi: Sadir Japarov nomzodini ilgari surdi
Navbatdagi prezidentlik saylovi 2027-yil 27-yanvarga belgilangan.
Qirg‘izistonning amaldagi prezidenti Sadir Japarov 2027-yil 27-yanvarga belgilangan prezidentlik saylovida nomzodini ilgari surdi. U 10-noyabr kuni mamlakat Markaziy saylov va referendumlar komissiyasiga tegishli bayonot topshirgan.
Bu haqda Markaziy saylov komissiyasi vakili TASS agentligiga ma’lum qilgan.
MSK ma’lumotiga ko‘ra, Japarov prezidentlikka nomzodini o‘zi ilgari surgan. U saylovda ishtirok etish uchun komissiyaga ariza topshirgan oltinchi nomzod bo‘ldi.
Avvalroq prezidentlik saylovida qatnashish uchun Rossiya-Qirg‘iziston taraqqiyot jamg‘armasining sobiq boshqaruv a’zosi Aymen Kasenov, Chuy viloyatidagi tumanlardan birining sobiq rahbari Azamat Esenbekov, Qirg‘iziston moliya politsiyasining sobiq rahbari Syimyk Japikeyev, tadbirkor Akay Qidirov va qirg‘iz kommunistlari yetakchisi Ishoq Masaliyev nomzodini ilgari surish bo‘yicha ariza topshirgan.
Qirg‘izistonda prezidentlik saylovi 2027-yil 27-yanvarda bo‘lib o‘tishi belgilangan. Nomzodlarni ko‘rsatish uchun arizalarni qabul qilish muddati 12-noyabrda yakunlanishi, nomzodlarni ro‘yxatga olish esa shundan keyin boshlanishi ma’lum qilingan.
Eslatib o‘tamiz, Sadir Japarov 2021-yil 28-yanvardan buyon Qirg‘iziston prezidenti lavozimida ishlab kelmoqda.
