AQSh Eronga qarshi keng ko‘lamli hujumlarni rejalashtirmoqda — NYT
Isroil AQShdan Eronga 4–7 kunlik havo hujumlarida ishtirok etishni so‘ramoqda.
AQSh prezidenti Donald Tramp Eronga qarshi keng ko‘lamli harbiy hujumlar uyushtirish imkoniyatini ko‘rib chiqmoqda, biroq hozircha yakuniy qaror qabul qilmagan. Bu haqda The New York Times (NYT) xabar berdi.
Gazeta manbalariga ko‘ra, Tramp yangi razvedka ma’lumotlari va mintaqada AQShning muhim harbiy kuchlari mavjudligini hisobga olmoqda. Isroil bosh vaziri Benyamin Netanyaxu esa AQShdan 4–7 kun davom etishi mumkin bo‘lgan havo hujumlarida ishtirok etishni so‘ramoqda.
Shu bilan birga, Isroilning yuqori lavozimli rasmiysi Netanyaxu Trampga bosim o‘tkazayotgani haqidagi xabarlarni rad etdi. AQSh ma’muriyatida esa razvedka ma’lumotlarining ishonchliligi va ehtimoliy yangi hujumlarning maqsadga muvofiqligi yuzasidan kelishmovchiliklar mavjud.
Isroil Eron raketa va dron zaxiralarini tiklayotgani, shuningdek, kimyoviy va biologik qurollar ishlab chiqayotgani haqida ogohlantirmoqda. NYT manbalariga ko‘ra, AQSh razvedkasi ham Eron harbiy salohiyati oshib borayotganini ko‘rsatuvchi belgilarni qayd etgan. Biroq, Tehron hozircha birinchi bo‘lib hujum qilishdan ko‘ra, AQSh va Isroilning keng ko‘lamli zarbalarini to‘xtatishga urinayotgani aytilmoqda.
NYT xabariga ko‘ra, AQSh harbiylari ehtimoliy nishonlar sifatida Eronning raketa va dron arsenallari, energetika obyektlari hamda Islom inqilobi qo‘riqchilari korpusining qo‘mondonlik punktlarini belgilagan.
Tramp hozircha Eron energetika obyektlariga keng ko‘lamli zarbalar berishga rozilik bildirmagan. Bunday hujumlar biznes va tinch aholini elektr ta’minotidan mahrum qilishi mumkin.
Ehtimoliy harbiy harakatlar qayta boshlanishi oldidan AQSh mintaqadagi ayrim obyektlardan xodimlarini olib chiqdi. Pentagon esa barcha variantlar ko‘rib chiqilayotganini ma’lum qildi.








