АҚШ муҳожирларни мамлакатдан чиқариб юборади
Муҳожирларга мамлакатни тарк этиш учун бир неча ҳафта муддат берилган.
Доналд Трамп маъмуриятининг қарори 532 000 га яқин кубалик, гаитилик, никарагуалик ва венесуэлик муҳожирларга таъсир қилади. Улар АҚШга ЧНВ дастури доирасида келган бўлиб, мазкур дастур 2022 йил октябрь ойида Жо Байден маъмурияти томонидан ишга туширилган ва 2023 йил январь ойида кенгайтирилган эди.
"Оқ уй томонидан асосан Лотин Америкасидан келган юз минглаб муҳожирларга мамлакатни тарк этиш учун бир неча ҳафта муддат берилган", дейилади агентлик хабарида.
Расмий маълумотларга кўра, мазкур муҳожирлар 25 март куни эълон қилиниши кутилаётган буйруқдан сўнг 30 кун ичида қонуний мақомларини йўқотишади. Агар улар мамлакатда қолишга имкон берувчи бошқа муҳожирлик мақомига эга бўлмасалар, 24 апрелга қадар АҚШни тарк этишлари лозим.
Мутахассисларнинг фикрига кўра, ушбу қарорни амалга ошириш мураккаб жараён бўлади, чунки у ЧНВ дастури асосида мамлакатга кирган муҳожирларнинг катта қисмини қамраб олади. Калифорниялик муҳожирлик ҳуқуқи бўйича адвокат Николетт Глайзернинг таъкидлашича, қарор амалга оширилса, "катта тартибсизлик" юзага келиши мумкин.
