Нурмагомедовнинг БААдаги жанжали қамоқ билан якунланди: жангчи олти ойга ҳукм қилинди
БААда жанжални видеога олган икки киши ҳам олти ойга қамалиб, 300 минг дирҳамдан жаримага тортилди.
Россиялик аралаш яккакураш устаси Усмон Нурмагомедов Бирлашган Араб Амирликларида собиқ UFC чемпиони, грузиялик Мераб Двалишвили билан боғлиқ муштлашув иши бўйича олти ойга қамоқ жазосига ҳукм қилинди. Иш юзасидан яна етти нафар судланувчига ҳам турли жазолар тайинланди. Бу ҳақда TASS хабар берди.
Маълумотларга кўра, жами ўн кишига нисбатан суд ҳукми чиқарилган. Олти нафар судланувчи жамоат тартибини бузиш, ваҳима қўзғатиш ва бошқаларнинг ҳаётини хавф остига қўйишда айбдор деб топилган. Уларга олти ойлик қамоқ жазоси, ҳар бирига 300 минг дирҳам миқдорида жарима ҳамда жазони ўтаб бўлгач, БАА ҳудудидан депортация қилиш жазоси тайинланган.
Жангни видеога олган яна икки киши ҳам олти ойлик қамоқ ва 300 минг дирҳам жаримага ҳукм қилинган. Улар шахсий ҳаёт дахлсизлигини бузиш, шунингдек, интернет орқали жанг тасвирларини суратга олиш ва тарқатишда айбдор деб топилган.
Қолган икки судланувчига жамоат тартибини бузиш ва бошқаларнинг жисмоний дахлсизлигига тажовуз қилиш айбловлари бўйича 50 минг дирҳамдан жарима тайинланган.
Дастлаб воқеанинг бошқа иштирокчилари билан бирга кўрсатма бериш учун ҳибсга олинган Мераб Двалишвили эса озод қилинган. Бу ҳақда Real American Freestyle (RAF) ташкилоти матбуот хизмати маълум қилди.
Эслатиб ўтамиз, воқеа 11 ноябрь куни содир бўлган. Муштлашув акс этган видеода Усмон Нурмагомедов Двалишвилига орқадан яқинлашиб, унинг юзига мушт туширгани кўринади. Шундан сўнг меҳмонхона фойесида жангчилар ва уларнинг жамоалари ўртасида оммавий жанжал келиб чиққан.
