АҚШ Украинага Донбассдан чиқиб кетиш эвазига НАТОга аъзоликни таклиф қилди — Зеленский
Украина президенти мамлакат ўз ҳудудларини Россия таркибига қўшилган деб тан олмаслигини таъкидлади.
АҚШ Украина билан музокараларда Донбассдан қўшинларни олиб чиқиш ва НАТОга аъзо бўлиш масалаларини ўзаро боғлиқ ҳолда илк бор кўтарди. Бу ҳақда Владимир Зеленский 14 ноябрь куни журналистлар билан учрашувда маълум қилди.
«Америкаликлар: “Агар Украина НАТОга қўшилса, Украина Донбассни тарк этадими?” деб сўрашди. Бу биринчи марта содир бўлмоқда», — деган Зеленский.
Украина президенти мазкур саволни қайси америкалик музокарачи берганига аниқлик киритмаган. Унинг таъкидлашича, АҚШ Украинанинг НАТОга аъзолигини тасдиқлаган тақдирда, бу масалани референдумга қўйишга тайёр. Бироқ бунинг учун таклифнинг аниқ шартлари ва тафсилотлари маълум бўлиши керак.
Зеленский Украина ўз ҳудудларидан воз кечмаслигини ва уларни Россия таркибига қўшилган деб тан олмаслигини яна бир бор таъкидлаган.
Унинг сўзларига кўра, Ғарб ҳамкорлари билан кенг қамровли хавфсизлик пакети муҳокама қилинмоқда. Унга НАТО ва Европа Иттифоқининг аниқ хавфсизлик кафолатлари, кучли Украина армияси, шунингдек, муайян давр учун зарур миқдордаги ҳарбий хизматчилар, қурол-яроғ ва молиявий ёрдам кириши мумкин.
Зеленский таклиф қилинаётган келишувнинг яна бир муҳим қисми сифатида урушдан кейинги тикланишни молиялаштириш манбаларини белгилаши керак бўлган «Фаровонлик режаси»ни ҳам тилга олган.
Украина қўшинларини Донбассдан олиб чиқиш Россия президенти Владимир Путиннинг урушни тугатиш бўйича асосий талабларидан бири ҳисобланади. Зеленский эса бундай чекинишга қарши эканини бир неча бор билдирган.
Аввалроқ АҚШ президентининг махсус вакили Жаред Кушнер Абу-Дабидаги уч томонлама музокаралардан кейин ҳудудий масалалар энг мураккаб масалалардан бири бўлиб қолаётганини айтган эди.
«The Economist» нашри манбаларига таяниб, америкалик музокарачилар Донецк ва Луганск вилоятлари чегараларини ўзгартириш ғоясини илгари сурганини ёзган. Нашрга кўра, бу таклиф Россияга мазкур ҳудудларни тўлиқ эгаллаганини эълон қилиш, бироқ Украинага бошқа ҳудудларни бермаслик имконини назарда тутган. Украина эса бу таклифни рад этган.
