Руандада депортация маркази: Германия ва яна тўрт давлат келишувга тайёрланмоқда
Ташаббус инсон ҳуқуқлари ташкилотларининг танқидига сабаб бўлмоқда.
Германия, Австрия, Греция, Дания ва Нидерландия бошпана олиш ҳақидаги аризаси рад этилган мигрантларни жойлаштириш учун Руандада махсус марказ ташкил этиш бўйича келишувга яқинлашди. Бу ҳақдаги режа 16 ноябрь куни расман эълон қилиниши кутилмоқда.
Марказга бошпана сўраш ҳақидаги аризаси рад этилган ва Европа Иттифоқи ҳудудини тарк этиши лозим бўлган, бироқ келиб чиқиш мамлакатига қайтариш имкони бўлмаган шахслар юборилиши режалаштирилмоқда.
Режага кўра, марказ Европа Иттифоқидан ташқарида ташкил этиладиган «қайтариш марказлари» (return hubs) тизимининг бир қисми бўлади. Бундай марказларни ташкил этиш имконини берувчи янги миграция қоидалари 2026 йил октябрь ойида кучга кирган. Беш давлат марказ фаолиятини 2027 йилда йўлга қўйишни кўзламоқда.
Ташаббус инсон ҳуқуқлари ташкилотларининг танқидига сабаб бўлмоқда. Хусусан, Халқаро қутқарув қўмитаси вакили Марта Веландер бундай марказлар мигрантларнинг ҳуқуқлари бузилиши хавфини ошириши мумкинлигини билдирган. Ҳуқуқ ҳимоячилари мигрантларнинг Европа Иттифоқи ҳудудидан ташқарида сақланиши, уларнинг ҳуқуқий ҳимояси ва яшаш шароитлари юзасидан хавотир билдирмоқда.
Аввалроқ Руандадан ташқари Уганда, Ўзбекистон ва Қозоғистон ҳам бундай марказларни жойлаштириш учун эҳтимолий ҳамкор давлатлар сифатида кўриб чиқилгани ҳақида хабарлар тарқалган эди.
