АҚШда тухум инқирози кузатилмоқда

АҚШда тухум нархининг кескин ошиши жамоат овқатланиш жойларини қийин аҳволга солиб қўйди, харидорларни эса молиявий имкониятларини қайта кўриб чиқишга мажбур қилмоқда. Сўнгги икки йил ичида тухум нархи ўртача 65 фоизга ошди, шундан 40 фоиз ўсиш фақатгина 2023 йил декабридан 2024 йил декабригача бўлган даврга тўғри келади.

 

Бу инқирознинг асосий сабаби 2022 йилдан бери давом этаётган парранда гриппи эпидемияси бўлиб, у АҚШдаги 145 миллиондан ортиқ товуқ ва бошқа уй паррандаларининг йўқ қилинишига олиб келди. 2024 йил охирида касаллик яна авж олди ва фақат ноябрь-декабрь ойларида 17 миллион парранда йўқ қилинди.

 

Натижада тухум нархи кескин кўтарилди: 2024 йил декабрида 12 дона тухум ўртача 3,65 доллардан сотилган бўлса, январь охирига келиб нарх 4,15 долларга етди. АҚШ қишлоқ хўжалиги вазирлиги маълумотларига кўра, 2025 йилда нарх яна 20 фоизга ошиши кутилмоқда.

 

АҚШ Миллий ресторан ассоциацияси (НРА) тухум танқислигидан энг кўп зарар кўрган жойлардан бири умумий овқатланиш соҳаси эканлигини таъкидламоқда.

 

Георгиа штатида жойлашган машҳур Ваффле Ҳоусе тармоғи, мамлакат бўйлаб 2 мингдан ортиқ ресторанларга эга бўлиб, ҳар йили 272 миллион тухум истеъмол қилади. Ушбу тармоқ тухум тақчиллиги сабабли ҳар бир тухумга қўшимча 50 сент нарх қўшишга мажбур бўлди.

 

Комила Одилова тайёрлади