Ҳурмуз бўғози қачон очилади? Эрон АҚШга етти шарт қўйди
Муҳсен Ризоий АҚШ Эроннинг шартларини тўлиқ қабул қилганидан кейингина бўғоз очилишини маълум қилди.
Эрон АҚШ Теҳроннинг еттита шартига тўлиқ ва аниқ жавоб бермагунча Ҳурмуз бўғозини очмаслигини маълум қилди. Бу ҳақда Эрон Олий Миллий Хавфсизлик Кенгаши котиби Муҳсен Ризоий X ижтимоий тармоғида ёзди.
Унинг таъкидлашича, Вашингтоннинг Эрон ҳуқуқлари ва талабларига оид жавоби қониқарсиз бўлган. АҚШ етти шартнинг барчасига аниқ жавоб бериши керак. Шундан кейингина бўғоз очилади.
1 ноябрь куни Axios нашри Қатар АҚШ ва Эрон ўртасида тўғридан-тўғри музокараларни тиклаш учун воситачилик қилаётгани ҳақида хабар берди. Нашр маълумотига кўра, Қатар вакиллари Эрон расмийлари билан уч кун давомида учрашган.
Эрон ташқи ишлар вазири Аббос Ароқчий эса ҳозирча келишувга эришилмаганини ва бу Вашингтоннинг Теҳрон саволларига жавобига боғлиқлигини билдирган.
13 октябрь куни АҚШ Эроннинг Ҳурмуз бўғозини очиш бўйича шартларининг фақат бир қисмини қабул қилгани ҳақида хабарлар тарқалган эди. Шундан сўнг Ризоий Теҳрон бўғозда аввалги юк ташиш тартибига қайтиш ниятида эмаслигини айтган.
3 ноябрь куни АҚШ вице-президенти Жей Ди Вэнс Вашингтон Эрон билан келишувга эришиш учун муддат белгиламаганини маълум қилган. Унинг сўзларига кўра, АҚШ Эроннинг ядровий дастурини тугатиш ва унинг қайта тикланмаслигини кафолатлашга интилмоқда.
