Австралия АҚШдан 5 та атом сувости кемаси сотиб олади
Мамлакат бош вазири кеча Жозеф Байден ва Риши Сунак билан учрашди.
Австралия АҚШдан 5 та атом сувости кемасини сотиб олмоқчи. Узоқ келажакда эса Лондон ва Вашингтон билан янги авлоддаги кемаларни биргаликда қурмоқчи.
Мамлакат бош вазири Энтони Альбанезе 13 март куни АҚШ етакчиси Жозеф Байден ва Буюк Британия ҳукумати раҳбари Риши Сунак билан Калифорнияда учрашганди.
Альбанезенинг сўзларига кўра, гап “Австралия тарихидаги мудофаа соҳасига бир вақтнинг ўзида киритилаётган энг йирик инвестиция” ҳақида бормоқда. Лойиҳа миллий иқтисодиётни қўллаб-қувватлайди ва тўғридан-тўғри 20 минг иш ўрни яратилади.
Учрашув давомида Байден Америка бир неча ўн йиллар давомида Ҳинд-Тинч океани минтақасидаги барқарорликни кафолатлаб келганини таъкидлади. Унинг фикрича, Австралиянинг АҚШ ва Буюк Британия билан атом сувости кемалари бўйича ҳамкорлиги тинчлик ташаббусларини узайтиради.
