Минглаб одамлар уйига қайтиши мумкин: Россия ва Украина асир алмашинувига тайёргарлик кўрмоқда
Бу уруш бошланганидан буёнги энг йирик асир алмашинуви бўлиши мумкинлиги таъкидланди.
АҚШ президентининг махсус элчиси Жаред Кушнер Россия ва Украина ўртасида ҳарбий можаро бошланганидан буёнги энг йирик асир алмашинувига тайёргарлик кўрилаётганини маълум қилди. Унинг айтишича, бу жараён минглаб одамларнинг ўз оилалари бағрига қайтишига имкон бериши мумкин.
«Умид қиламизки, ҳар икки томон ҳам ушбу муҳим қадамни амалга ошириш учун зарур бўлган хайрихоҳлик ва жиддий ниятларни намоён этади», деб ёзган Кушнер X ижтимоий тармоғида.
Ушбу баёнот Россия ва Украина ўртасидаги бир неча кунлик музокаралардан сўнг янгради. Мулоқотларда АҚШ номидан Жаред Кушнер ва махсус элчи Стив Уиткофф иштирок этган. 12 ноябрь куни улар Россия президенти Владимир Путин билан Кремлда учрашган. Шунингдек, америкалик вакиллар Украина президенти Владимир Зеленский билан ҳам музокаралар ўтказган.
Кушнернинг таъкидлашича, томонлар ўртасида сезиларли келишмовчиликлар сақланиб қолаётган бўлса-да, музокараларда муайян ютуқларга эришилган. Унинг сўзларига кўра, томонларнинг хавотирларини тушуниш, эҳтимолий ечимларни аниқлаш ва кейинги қадамларни белгилаш бўйича ишлар олиб борилмоқда.
12 ноябрь куни Кремлда бўлиб ўтган Путин, Уиткофф ва Кушнер учрашуви икки соатдан ортиқ давом этган. Россия президенти америкалик вакиллардан АҚШ президенти Дональд Трампга Москва ва Киев ўртасидаги алоқаларни йўлга қўйишга кўмаклашаётгани учун миннатдорлик билдиришни сўраган. Шунингдек, Путин Украинадаги айрим гуманитар масалаларда натижаларга эришилганини қайд этган.
Ҳозирча асир алмашинувининг аниқ санаси, иштирокчилар сони ва бошқа тафсилотлари очиқланмаган.
