Туркияда вертолёт қулади: тўрт ҳарбий ҳалок бўлди
Ҳозирда ҳарбий вертолётнинг қулаш сабаблари ўрганилмоқда.
Туркиянинг шарқидаги Малатья вилоятида S-70 русумли ҳарбий вертолёт ҳалокатга учради. Ҳодиса оқибатида бортдаги тўрт нафар ҳарбий хизматчи ҳалок бўлди.
Reuters хабарига кўра, ҳодиса 12 ноябрь куни кечқурун Малатья вилоятининг Ешилюрт тумани Саманқўй ҳудудида, Туркия ҳаво кучлари қўмондонлик базаси яқинида содир бўлган.
Вертолёт ҳалокатга учрагани ҳақида хабар келиб тушгач, воқеа жойига фавқулодда хизматлар, жумладан, ўт ўчирувчилар, полиция, тиббиёт ходимлари ва Табиий офатларни бошқариш бошқармаси (AFAD) вакиллари юборилган.
Туркия Мудофаа вазирлиги дастлаб вертолёт қолдиқлари топилгани ва қидирув-қутқарув ишлари бошланганини билдирган. Кейинчалик эса бортдаги тўрт нафар ҳарбий хизматчининг ҳалок бўлганини тасдиқлаган.
Ҳозирча ҳалокат сабаби маълум қилинмаган. Ҳодиса юзасидан текширув олиб борилмоқда.
