Санкт-Петербургда чамадондан ўзбекистонлик аёлнинг жасади топилди: 15 ёшли ўғли гумонланмоқда
Аёл 1 ноябрь куни ишга кетганидан кейин бедарак йўқолган.
Россиянинг Санкт-Петербург шаҳри Вйборг туманидаги Парголово қишлоғида чамадон ичидан аёлнинг жасади топилди. Жиноятни содир этишда унинг 15 ёшли ўғли гумон қилиниб, ҳибсга олинган. Бу ҳақда Россия Тергов қўмитасининг минтақавий бошқармаси матбуот хизмати хабар берди.
Маълум қилинишича, ноябрь ойи бошида бедарак йўқолган аёлнинг ўлими билан боғлиқ ҳолат юзасидан қотиллик моддаси бўйича тергов бошланган. Терговчилар ва тезкор ходимлар олиб борган изланишлар натижасида унинг жасади Юкковский дарёси бўйидаги табиат йўлагидан чамадон ичида топилган.
РИА Новости агентлигига ҳуқуқни муҳофаза қилувчи органлар ходимлари маълум қилишича, аёлнинг бедарак йўқолгани ҳақида унинг синглиси полицияга хабар берган. Ўзбекистонда туғилган аёл фаррош бўлиб ишлаган ва ўғли билан ижарага олинган хонадонда яшаган.
У охирги марта 1 ноябрь куни ишга борганидан кейин бедарак йўқолган. Аёл телефон қўнғироқларига жавоб бермаган, бироқ SМS хабарлар юбориб турган. Хабарларда қаерда ва ким билан эканини билдирмаган.
Шунингдек, унинг ўғли мактабга онаси номидан ёзилган, касаллиги сабабли дарсга келолмаслиги ҳақидаги хатни олиб келган.
Ҳозирда 15 ёшли ўсмирга нисбатан эҳтиёт чорасини танлаш масаласи ҳал қилинмоқда. Тергов давом этмоқда.
