АҚШда туғилиш орқали фуқаролик олишга уриниш: 6 мингдан ортиқ виза бекор қилинди
АҚШ Давлат департаменти туғилиш туризмини ташкил этишга алоқадор шахсларни аниқлаш ва жавобгарликка тортиш чораларини кўрмоқда.
АҚШ Давлат департаменти туғилиш туризмида иштирок этган ёки уни ташкил этишга кўмаклашган хорижий фуқароларнинг 6 мингдан ортиқ визасини бекор қилди. Бу ҳақда идора X ижтимоий тармоғидаги саҳифасида маълум қилди.
Департамент баёнотига кўра, туғилиш туризмининг олдини олиш бўйича махсус ишчи гуруҳ ушбу амалиётга алоқадор шахсларни аниқлаш ва уларни жавобгарликка тортиш чораларини кўрмоқда.
Туғилиш туризми — хорижий фуқароларнинг фарзандига АҚШ фуқаролигини олиш мақсадида мамлакатга бориб, у ерда туғруқни амалга оширишидир. АҚШ Давлат департаменти маълумотига кўра, мамлакатга фарзандига фуқаролик олиш мақсадида туғиш учун бориш сайёҳлик визасини бериш учун мақбул асос ҳисобланмайди.
Туғилиш туризмининг олдини олиш бўйича махсус ишчи гуруҳ 2026 йил 12 августда ташкил этилган. У виза эгаларининг сафарлари ва фаолиятини ўрганиш, ушбу амалиётга алоқадор шахсларнинг визаларини бекор қилиш ҳамда уни ташкил этувчи тармоқларни аниқлаш билан шуғулланади.
Аввалроқ, 31 октябрь куни Давлат департаменти туғилиш туризми билан боғлиқ 4 мингдан ортиқ виза бекор қилинганини билдирган эди. Сўнгги баёнотда эса бу кўрсаткич 6 мингдан ошгани маълум қилинди.
