Саудия Арабистонига ракета ҳужуми: ҳусийлар иккита баллистик ракета учирди
Ҳусийлар Ар-Риёддаги Қирол Холид халқаро аэропорти ва Шарқий-Ғарбий нефть қувуридаги насос станциясига ҳам ҳужум қилганини даъво қилмоқда.
Ямандаги ҳусийлар ҳаракати Саудия Арабистонининг Жазон вилоятида жойлашган ҳарбий кучлар тўпланган ҳудудларга иккита баллистик ракета учирганини маълум қилди. Шунингдек, гуруҳ Ар-Риёддаги Қирол Холид халқаро аэропорти ҳамда Шарқий-Ғарбий нефть қувуридаги насос станциясига ҳам ҳужум қилганини даъво қилмоқда. Бу ҳақда Reuters хабар берди.
Ҳусийларнинг баёнотига кўра, ҳужум 13 ноябрь, жума куни Саудия Арабистонининг Яман билан чегарадош Жазон вилоятидаги ат-Тувал ҳудудида амалга оширилган.
Бу воқеа Саудия Арабистони фуқаро муҳофазаси хизмати вилоятда хавф ўтганини маълум қилганидан бир неча соат ўтиб содир бўлган. Бироқ ҳусийлар ҳужуми аввалги огоҳлантиришлар билан боғлиқ ёки боғлиқ эмаслиги ҳозирча аниқ эмас.
Гуруҳ алоҳида баёнотида Ар-Риёддаги Қирол Холид халқаро аэропорти ва Саудия Арабистонининг Шарқий-Ғарбий нефть қувуридаги насос станциясини ҳам нишонга олганини айтган. Саудия Арабистони бу даъволарни ҳозирча тасдиқламаган.
Жазон вилоятида Саудия Арабистонининг Saudi Aramco компаниясига тегишли, кунига 400 минг баррел хом нефтьни қайта ишлаш қувватига эга нефтьни қайта ишлаш заводи жойлашган. Мамлакатнинг Яман билан чегарадош жанубий ҳудудлари, жумладан, ҳарбий объектлар ва энергетика инфратузилмаси аввал ҳам ҳусийларнинг ракета ва дрон ҳужумларига учраган.
