Birlashgan Arab Amirliklari G‘azoga vaziyatni tartibga solish uchun harbiy kuch jo‘natishga tayyorligini eʼlon qildi.
BAA G‘azodagi ko‘p millatli “barqarorlashtirish” missiyasini amalga oshirish uchun anklav hududiga qo‘shinlarini kiritishga tayyorligini bildirgan. Shu tariqa Abu-Dabidagi hukumat G‘azoga qo‘shinlarini kiritishni taklif qilgan dunyodagi birinchi mamlakatga aylangan.
Birlashgan Arab Amirliklarining Tashqi ishlar vazirligidagi maxsus vakili Lana Nusseyba, agar AQSH missiyaga boshchilik qilsa va Falastin davlatini barpo etish yo‘lidagi qadamlarni qo‘llab-quvvatlasa, BAA o‘z kuchlarini G‘azoga joylashtirishi mumkinligini aytgan.
“BAA arab davlatlari va xalqaro hamkorlar bilan birga ʼbarqarorlashtirishʼ kuchlarining bir qismi sifatida harakat qilish masalasini ko‘rib chiqishi mumkin. Mamlakatimiz G‘azodagi fojia davom etishini xohlamaydi. Qo‘shma Shtatlar vaziyatni tartibga solish uchun ushbu tashabbusni o‘z qo‘liga olishi kerak”, degan Lana Nusseyba.