Чиқиндиларни камайтириш учун қўшимча солиқ жорий этилиши мумкин

Европа Иттифоқи (ЕИ) тарихда илк бор аъзо давлатлар учун озиқ-овқат чиқиндиларини камайтириш бўйича қонуний мажбуриятлар жорий қилди. Янги келишувга кўра, 2030 йилгача чакана савдо, ресторанлар ва уй хўжаликлари озиқ-овқат чиқиндиларини 30 фоизга қисқартириши лозим.

 

Шунингдек, озиқ-овқат ишлаб чиқарувчилари ва қайта ишловчилари чиқиндиларни камида 10 фоизга камайтириш мажбуриятини олади. Расмий ҳисоб-китобларга кўра, Европада ҳар йили 59 миллион тонна озиқ-овқат чиқиндиси ҳосил бўлиб, бу 132 миллиард евро зарар келтирмоқда.

 

Келишув, шунингдек, тўқимачилик саноатини ҳам ўз ичига олди. Янги қонунларга кўра, мода брендлари ва ишлаб чиқарувчилар маҳсулотларининг барқарорлиги ва экологик таъсирига қараб чиқиндиларни йиғиш, саралаш ва қайта ишлаш учун молиявий ҳисса қўшишлари шарт бўлади.

 

 

Янги қоидалар арзон ва тез эскирадиган кийимлар ишлаб чиқарувчи брендларга қўшимча солиқлар киритиши мумкин. Қонунчилик, шунингдек, агрессив реклама кампаниялари орқали истеъмолчиларни тез-тез кийим алмаштиришга ундайдиган компанияларни ҳам нишонга олади.

 

Битим ҳозирча дастлабки ҳисобланиб, Европа Иттифоқи Кенгашида ҳукумат вакиллари томонидан тасдиқланиши кутилмоқда.