“Davlat fuqarolik xizmatini tashkil etish bo‘yicha qo‘shimcha chora-tadbirlar to‘g‘risida”gi Prezident qarori loyihasi muhokamaga qo‘yildi.
Loyihaga ko‘ra, 2023-yil 1-yanvardan boshlab davlat fuqarolik xizmati tatbiq qilingan davlat organlari va tashkilotlarida quyidagi tartib joriy etiladi:
—davlat fuqarolik xizmatchilari majburiy, rejali va rejadan tashqari tartibda rotasiya qilinadi;
—davlat fuqarolik xizmatchilarini rotasiya qilish bir davlat organi doirasida hamda boshqa davlat organlari o‘rtasida amalga oshiriladi;
—davlat fuqarolik xizmatchisi rotasiya tartibida lavozimga tayinlanganda tanlov o‘tkazilmaydi;
—rotasiya tartibida lavozimga tayinlangan davlat fuqarolik xizmatchilariga ijtimoiy kafolatlar va tegishli kompensasiyalar belgilanadi;
—Davlat xizmatini rivojlantirish agentligi davlat fuqarolik xizmatida majburiy ravishda rotasiya qilinishi lozim bo‘lgan davlat fuqarolik xizmati lavozimlari monitoringini olib boradi.
Davlat fuqarolik xizmatida majburiy ravishda rotasiya tartibidagi tayinlovlar lavozimni egallagan kundan boshlab har besh yilda amalga oshiriladi, bunda qonunchilikka muvofiq boshqa muddatlar belgilanishi mumkin.
Axborot texnologiyalari va kommunikasiyalarini rivojlantirish vazirligi hamda Davlat xizmatini rivojlantirish agentligi 2023 yil 1 aprelga qadar “Davlat fuqarolik xizmati yagona elektron axborot-tahliliy tizimi” dasturiy-apparat kompleksi tarkibidagi “hrm.argos.uz” avtomatlashtirilgan axborot tizimida davlat fuqarolik xizmatchilarini rotasiya qilish jarayonini elektron yuritish imkoniyatini yaratadi.