Tehron Moskvaga mudofaa tizimlari, raketalar va vertolyotlar buyurtma qilgan.
“Tasnim” agentligining xabar berishicha, su-35 ko‘p maqsadli supermanevrli qiruvchi samolyotlari 21-martgacha yetib kelishi kerak.
"Biz Rossiyaga mudofaa tizimlari, raketalar va vertolyotlar uchun buyurtmalar yubordik. Bu qurollarning aksariyati tez orada mamlakatga kiradi", — degan Milliy xavfsizlik va tashqi siyosat komissiyasi aʼzosi Shahriyar Haydariy.
Eron Harbiy-havo kuchlari qo‘mondoni, brigada generali Hamid Vahidiy 2022-yil sentyabrida Moskvadan su-35 sotib olish kun tartibida ekanini taʼkidlagan edi.
2022-yil 24-dekabr kuni Isroilning “i24news” telekanali Moskva va Tehron o‘rtasidagi harbiy kelishuvlarni kuzatuvchi razvedka manbalariga tayanib, Rossiya tez orada Eronga qiruvchi samolyotlar eskadrilyasini yetkazib berishi haqida xabar berdi.
Katta ehtimol bilan, bu dastlab Misr uchun mo‘ljallangan 24 ta su-35 qiruvchisi bo‘lgan, deb xabar berdi telekanl. Razvedka maʼlumotlariga ko‘ra, eronlik uchuvchilar allaqachon ushbu samolyotlarda mashg‘ulotlar olib borgan.
Eron o‘z navbatida Rossiyaga yetkazib berilgan 1700 ta drondan tashqari yana 300 ta Shahed-136 kamikadze dronlarining partiyasini yuborishi kerak edi. Moskva Ukrainaga zarba berish uchun Eron qurolidan foydalanganini rad etib keladi.