Unga ko‘ra, bo‘lajak institutda taʼlim faoliyati 2021/2022 o‘quv yilidan boshlab yo‘lga qo‘yiladi. O‘qish davlat granti hamda to‘lov-kontrakt asosida amalga oshiriladi. Shuningdek, 2022/2023 o‘quv yilidan boshlab, bakalavriatda 2 ta yangi, jumladan, bastakorlik sanʼati va sanʼatshunoslik: musiqashunoslik taʼlim yo‘nalishlari ochilishi taʼkidlangan. Bunda tashqari, magistraturada 2 ta yangi mutaxassislik - ovoz rejissyorligi: musiqiy ovoz rejissyorligi hamda musiqa sanʼati yo‘nalishlari tashkil etiladi.
Ayni kunlarda institutning asosiy vazifalari belgilanmoqda. Jumladan, yuqori malakali mutaxassislar va ilmiy-pedagog kadrlarni tayyorlash, milliy estrada yo‘nalishida zamonaviy ijro namunalarining “Oltin fondi”ni yaratish hamda ularni notaga ko‘chirish va amaliyotga keng joriy etish kabilar shular sirasiga kiradi. Bunga qo‘shimcha tarzda, milliy estrada yo‘nalishi bo‘yicha fundamental, amaliy va ijodiy izlanish hamda tadqiqotlar olib borish ham yo‘lga qo‘yilishi ham rejada bor.
2022/2023 o‘quv yilidan boshlab bolalar musiqa va sanʼat maktablari (324 ta), ixtisoslashtirilgan sanʼat va madaniyat maktablari (17 ta), maktab-internatlar (8 ta) hamda madaniyat, musiqa va sanʼat kollejlarida (2 ta) “Mahorat darslari” yo‘lga qo‘yiladi. Ularga institutning yetakchi professor-o‘qituvchilari hamda mamlakatimizda ijod qilib kelayotgan taniqli estrada ijodkorlari biriktiriladi.
Avvalroq Butunrossiya davlat kinematografiya institutining O‘zbekistondagi filiali hamda Toshkentda Markaziy Osiyo xalqaro instituti ochilgani haqida xabar berilgandi.
Olamgir Abdiyev