Samarqand, Farg‘ona va Toshkent shaharlarida pora olgan advokatlar qo‘lga tushdi. Bu haqida Davlat xavfsizlik xizmati xabar bermoqda.
Qayd etilishicha, Farg‘ona shahridagi advokatlik firmalarida ishlovchi 2 nafar advokat 6 yil 8 oy muddatga ozodlikdan mahrum qilingan va hozirda jazo muddatini o‘tayotgan mahkum jazosini sud organlaridagi tanishlari orqali ozodlikdan mahrum qilish bilan bog‘liq bo‘lmagan boshqa jazoga o‘zgartirib berish evaziga 50 ming dollar olgan vaqtlarida ushlangan.
Shuningdek, Toshkent shahridagi advokatlik firmasining muqaddam bir necha marotaba sudlangan advokati to‘qimachilik mahsulotlari ishlab chiqarishga ixtisoslashgan MCHJning mansabdor shaxslariga nisbatan Jinoyat Kodeksining 167-moddasi 3-qismi “a” bandi bilan qo‘zg‘atilgan jinoyat ishi doirasida aniqlangan 12 mlrd so‘m miqdoridagi zararning 6 mlrd so‘mini prokuratura va ichki ishlar organlaridagi tanishlari yordamida jabrlanuvchi foydasiga undirib berish evaziga 100 ming dollar talab qilgan. Ammo u so‘ralgan pul mablag‘idan 50 ming dollarini olgan vaqtida qo‘lga olingan.
Tezkor tadbir davom ettirilib, advokatning ushbu ishga aloqador bo‘lgan hamkasbi va muqaddam prokuratura organlarida ishlagan tanishi ham 50 ming dollardan 30 ming dollarini olgan vaqtlarida ushlangan.
Bundan tashqari, Samarqand shahridagi advokatlik firmasining avval sudlangan advokati Oqdaryo tumanida yashovchi fuqaroning turmush o‘rtog‘i bilan qonuniy nikohini bekor qilishda sud tizimidagi tanishlari orqali yordam berish evaziga 5 ming dollar olgan vaqtida qo‘lga tushgan.
Hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qo‘zg‘atilgan.