Ijtimoiy tarmoqda Farg‘ona viloyatidagi savdo majmuasida bozor maʼmuriyati va tadbirkorlar o‘rtasida janjal yuzaga kelgani aks etgan video tarqalmoqda.
Aniqlanishicha, holat 24 iyul kuni soat 13:30 lar atrofida sodir bo‘lgan. Kelishmovchilikka tadbirkorlar o‘z mahsulotlarini shartnomada ko‘rsatilmagan joylarda, yaʼni bozor ichki yo‘laklarigacha chiqarib sotish holatlari sabab bo‘lgan.
Bozor maʼmuriyati favqulodda holatlarning oldini olib, tushuntirish ishlarini boshlaganda tadbirkorlar o‘rtasida o‘zaro tushunmovchilik yuzaga kelgan. Janjalda hech kim hech qanday tan jarohati olmagan.
Mazkur vaziyatning har bir holati bo‘yicha belgilangan tartibda maʼmuriy ishlar olib borilmoqda.