Fransiya Prezidenti Emmanuel Makron mamlakatining yaqin oylarda Falastinni mustaqil davlat sifatida rasman tan olishi mumkinligini ma’lum qildi. U bu haqda Misrga qilgan ikki kunlik tashrifi ortidan France 5 telekanaliga bergan intervyusida gapirdi.
Makronning aytishicha, Parij ushbu qarorni xalqaro hamjamiyat bilan hamkorlikda, ayniqsa, adolat va barqarorlik yo‘lida qabul qilishni istaydi.
“Falastin davlatini tan olish yo‘lida harakat qilishimiz kerak. Yaqin oylar ichida bunga erishamiz. Bu — adolat sari tashlangan muhim qadam bo‘ladi,” — dedi u.
Shuningdek, 2025-yil iyun oyida Saudiya Arabistonida o‘tkazilishi rejalashtirilgan, Falastin va Isroil o‘rtasidagi mojaroga bag‘ishlangan xalqaro anjumanda Fransiya hamraisi sifatida qatnashadi. Falastinni tan olish qarori aynan shu anjumanda rasman e’lon qilinishi mumkin.