Патриот тизимлари ва ракета қурилмалари нишонда: Эрон Қувайтдаги АҚШ ҳарбий базасига ҳужум қилди
Аввалроқ Баҳрайндаги АҚШ радар станцияси ҳам нишонга олинган эди.

Эрон ҳарбийлари Қувайтдаги АҚШ қўшинлари фойдаланадиган Али ал-Салим авиабазасига дрон ҳужумлари уюштирилганини маълум қилди. Бу ҳақда Эроннинг IRNА ахборот агентлиги хабар берди.
Эрон томонининг баёнотига кўра, ҳужумлар авиабазада жойлашган Американинг Патриот ҳаво мудофаа тизимлари ва ракета учириш қурилмаларига қаратилган. Теҳрон ушбу базани АҚШ ҳарбийларининг минтақадаги ҳарбий ва логистика фаолияти учун муҳим объект деб ҳисоблайди.
Эрон ҳарбийларининг баёноти Қувайт армияси ҳаво мудофааси кучлари “душман дронлари” ҳужумини қайтаргани ҳақидаги хабардан кейин эълон қилинди.
Эрон кетма-кет иккинчи кун АҚШ ҳарбий объектларига зарба берганини билдирмоқда. 17 ноябрь куни Ислом инқилоби қўриқчилари корпуси (IRGC) дронлари Баҳрайндаги Шайх Исо авиабазасида жойлашган АҚШ радар станциясига зарба берганини маълум қилган эди. Корпус бу ҳаракатни АҚШ дронларининг Эрон ҳаво ҳудудига кириб келишига жавоб сифатида изоҳлаган.
Бундан ташқари, ўтган ҳафта Эрон расмийлари Европа мамлакатларидаги АҚШ ҳарбий объектларига ракета зарбалари берилиши мумкинлиги ҳақида таҳдид қилган эди.








