Имтиёзли кредит машмашалари
Фуқарога имтиёзли шартлар асосида автокредит ваъда қилган шахс фирибгар бўлиб чиқди.
Бош прокуратура ҳузуридаги Департаментнинг Қорақалпоғистон Республикаси Тупроққалъа туман бўлими томонидан ўтказилган терговга қадар текширув ишларида фирибгарлик иши кўрилди. Маълумотларга кўра, фуқаро О.С. фуқаро Г.нинг ишончига кириб, унга имтиёзли шартлар асосида, кредитга автотранспорт воситаси олиб беришни ваъда қилган. Алдовлар билан унинг 3 000 АҚШ доллари миқдоридаги маблағини қўлга киритган. Танишлари борлигидан фойдаланиб банк муассасасига Г.нинг номидан пул тўланганлиги тўғрисидаги сохта тўлов квитанцияси олиб берган.
Ҳозирда мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ уй олиб беришни ваъда қилган фирибгар ушлангани ҳақида хабар берилганди.
Кўплаб огоҳлантиришлар ва фирибгарликлар сони кўплигига қарамай, озгина вақт ёки пулдан ютиш мақсадида ваколати бўлмаган шахсларга ишониб, моли ва тинчлигидан айрилиш ҳолатлари кўп учрамоқда.
Шундай вазиятларни кўрсатиш орқали ҳамюртларимиздан янада эътиборли бўлишларини ва ақл билан иш тутишларини сўраб қоламиз.
Мафтуна Режаббоева тайёрлади.
