Италияда мафияга қарши судда 200 дан ортиқ кишига ҳукм ўқилди

 

Италия суди 20 ноябрь куни Италия жанубидаги Калабрия вилоятидан "Ндрангета" жиноий мафия гуруҳига алоқадор бўлган 200 дан ортиқ кишини айбдор деб топди ва турли муддатларга қамоқ жазосига ҳукм қилди. Бу сўнгги 30 йил ичида мамлакатдаги энг йирик мафия иши бўйича суд бўлди.

 

Умуман олганда, ишда 400 дан ортиқ модда, жумладан, гиёҳвандлик воситалари ва қурол савдоси, товламачилик ва мафия билан алоқадорликда айбланган 338 киши иштирок этган. Прокурорлар 322 айбланувчига жами 5000 йилга яқин қамоқ жазосини сўраган.

 

Натижада суд 131 нафар айбланувчини оқлади ва 207 нафарини жами 2000 йилдан ортиқ қамоқ жазосига ҳукм қилди. Ҳукмнинг эълон қилиниши тахминан бир ярим соат давом этди.

 

 

Энг оғир жазолар "Ндрангета"нинг икки етакчи аъзоси — Саверио Рационале ва Доменико Бонавотега берилди - 30 йиллик қамоқ жазоси. Айбланганлар орасида 11 йиллик қамоқ жазосига ҳукм қилинган собиқ депутат Жанкарло Питтелли ҳам бор.

 

Ҳукмлар Ламеция-Терме шаҳрида шу мақсадда махсус қурилган мажмуада бўлиб ўтган қарийб уч йиллик суд жараёнини якунлади. Суд жараёнида яна 70 нафар судланувчи 2021 йил ноябрь ойида жазо муддатини қисқартириш эвазига тезкор суд жараёнини танлаб, айбдор деб топилди.

 

Маълумот ўрнида: "Ндрангета" Италиядаги энг нуфузли замонавий мафия гуруҳларидан бири ҳисобланади. У қурол, одам савдоси ва гиёҳванд моддалар билан шуғулланади ҳамда кўп миллиард долларлик айланмага эга. 2016 йилда унинг аъзолари 2012 йилда содир бўлган икки даҳшатли зилзиладан сўнг Италия шимолида қурилиш бизнеси ва кўчмас мулк билан боғлиқ операцияларда фирибгарликда айбланган эди.