Мессининг голи жамоасини мағлубиятдан қутқариб қололмади
"Интер Маями" 23-ўриндаги жамоага имкониятни бой бериб қўйди.
Кеча МЛСнинг навбатдаги тур ўйини якунланди. Унда “Интер Маями” “Атланта Юнайтед”га 1:3 ҳисобида имкониятни бой берди.
44-дақиқада грузиялик ярим ҳимоячи Саба Лобжанидзе учрашувда ҳисобни очди. Иккинчи бўлим бошида яна ўша грузин футболчиси дубл қайд этди. Орадан 3 дақиқа ўтиб мезбонларнинг аргентиналик ҳужумчиси Лионел Месси испаниялик ярим ҳимоячи Серхио Бускетснинг узатмасидан сўнг ҳисобни қисқартирди. Бироқ, 73-дақиқада меҳмонларнинг сенегаллик ҳужумчиси Жамол Тиаре “Интер Маями” дарвозасига учинчи голни уриб, ўйинга нуқта қўйди.
Юлдузли футболчилар Хорди Алба ва Луис Суарес асосий таркибда майдонга тушган бўлишига қарамай жамоасига ёрдам бера олмади. МЛС турнир жадвалида “Интер Маями” 34 очко билан пешқадамлик қилмоқда. "Атланта Юнайтед" эса 16 очко билан турнир жадвалида 23-ўринда бормоқда.
