Метрода қизга шилқимлик қилган яна бир йигит 5 суткага қамалди
Йигит тиқилинчда қизга билмай тегиб кетганини айтган. Қиз эса йигит бу ишни қилаётганда қўлидан ушлаб олгани ва гаплашиб олмоқчи бўлганида йигит қочиб кетганини билдирган.
2024 йил 9 апрель куни Тошкент шаҳар жиноят ишлари бўйича Чилонзор тумани судида метрода ўзига нотаниш қизга шилқимлик қилган йигит устидан суд ҳукми ўқилди.
Суд мажлисида сўроқ қилинган ҳуқуқбузар, 1999 йилда туғилган Х.А.нинг кўрсатувига кўра, у 2024 йил 27 март куни "Пахтакор" метро бекатидан "Новза" бекатига қараб ҳаракатланган, метро ичида одамлар кўп бўлгани сабабли одамлар бир-бирига тегиб турган. Х.А. ўша вақтда ўзи билмаган ҳолда қизнинг белдан пастки қисмига тегиб кетганини, ҳозирда қилган ишидан пушаймонлигини, унга нисбатан енгиллик беришни сўради.
Суд мажлисида сўроқ қилинган жабрланувчи қиз "Ойбек" метро бекатидан "Новза" метро бекатига қараб ҳаракатланганини, метрода кетаётган вақтида Х.А. унга нисбатан уятли ҳаракатлар қилганини айтди. Қиз дастлаб метрода одам кўп бўлгани сабабли орқасида турган қиз боланинг сумкаси тегиб кетган деб ўйлаган, сўнгра унга яна тегина бошлаганида Х.А.нинг қўлидан ушлаб олган. Гаплашиб олиш мақсадида Х.А.нинг орқасидан борганига қарамасдан йигит қочиб кетган. Жабрланувчи ҳуқуқбузарга нисбатан қонуний чора кўришни сўради.
Суд Х.А. Маъмурий жавобгарлик тўғрисидаги кодекснинг 41−1-моддасида (Шаҳвоний шилқимлик) назарда тутилган ҳуқуқбузарликни содир қилган деб топиб, унга нисбатан 5 (беш) сутка маъмурий қамоқ жазоси тайинлади.
