Hukumat qarori bilan O‘zbekistonning Rossiya Federatsiyasidagi konsullik muassasalarida eski namunadagi milliy haydovchilik guvohnomasini yangisiga almashtirish tartibi bo‘yicha vaqtinchalik nizom tasdiqlandi.
Unga ko‘ra, yangi namunadagi milliy haydovchilik guvohnomasi konsullik muassasasi orqali almashitirladi. Bunda hujjatlar Ichki ishlar vazirligining Yo‘l harakati xavfsizligi bosh boshqarmasi (IIV YHXBB) tomonidan rasmiylashtiriladi.
Talabgor eski namunadagi milliy haydovchilik guvohnomasini yangisiga almashtirish uchun konsullik muassasasiga ariza bilan shaxsan murojaat qilishi lozim. Konsullik muassasasi talabgor nomidan so‘rovnomani to‘ldirib, IIV YHXBBga yuboradi. Shundan so‘ng, Yo‘l harakati xavfsizligi bosh boshqarmasi taqdim etilgan maʼlumotnomani ko‘rib chiqib, 1 ish kunida yangi namunadagi milliy haydovchilik guvohnomasini rasmiylashtiradi va hujjatlarni Tashqi ishlar vazirligi Konsullik-huquqiy departamentiga (TIV KHD) yuboradi. TIV KHD tasdiqlangan haydovchilik guvohnomasini konsullik muassasasiga diplomatik pochta orqali taqdim etadi.
Konsullik muassasasi 1 ish kunida yangi namunadagi milliy haydovchilik guvohnomasini egasiga beradi. Shuningek, tashkilot asoslangan sabablarga ko‘ra, talabgorning arziasini rad etishi ham mumkin.
Eski namunadagi milliy haydovchilik guvohnomasi yangisiga almashtirish uchun quyidagilar undiriladi:
➖ BHMning 70 foizi miqdorida to‘lov;
➖ 20 AQSH dollari miqdorida konsullik yig‘imi;
➖ 20 AQSH dollari miqdorida haqiqiy xarajatlarning o‘rnini qoplash uchun yig‘im.
Bundan avval "Prava”sini almashtirmaganlarga qo‘shimcha imkoniyatlar yaratilgani hamda ID-kartaga ega haydovchilardan haydovchilik guvohnomasini ko‘rsatish talab etilmasligi haqida xabar berilgandi.
Olamgir Abdiyev