Yana bir necha kunlardan so‘ng JCH-2022 ham yakunlanadi. Nafaqat chempionlar, balki turnirning eng yaxshi to‘purari nomi ham tarixga oltin harflar bilan yoziladi. U chempion bo‘lgan jamoadan bo‘lishi mumkin, ammo bunday tasodiflar doim ham sodir bo‘lavermaydi.
Shunga qaramay, eng yaxshi to‘purar sovrini uchun asosiy nomzodlar jiddiy raqobatga kirishgan. Poygada Kilian Mbappe yetakchilik qilmoqda. U turnir davomida beshta gol urdi. Daniya va Polshaga qarshi o‘yinlarda dubl qayd etdi. Shuningdek, 1-tur uchrashuvida Avstraliya darvozasini ishg‘ol qildi. Angliya Mbappeni chorak finalda yopdi va Kilianni imkoniyatsiz qoldirdi, ammo bu ularni muvaffaqiyat sari yetaklamadi.
Mbappening ikkita asosiy raqibidan biri jamoadoshi Olive Jirudir. Markaziy hujumchi musobaqada to‘rtta gol urdi. Jiru avstraliyaliklarga qarshi bahsda dubl qayd etdi. Pley-offda polyaklar va britaniyaliklar darvozasini ishg‘ol qildi. Turnir davomida Olive Fransiya terma jamoasi tarixidagi eng yaxshi to‘purarga aylandi. Bundan tashqari u JCH-2022 to‘purari sovrinini ham qo‘lga kiritishi mumkin. Rossiyada o‘tgan oxirgi jahon chempionatida Jiru bironta gol urolmagan edi. Yarim finalda Jiru va Mbappe jamoasi bilan birga chempionat davomida hali gol o‘tkazib yubormagan Marokash darvozasini ishg‘ol qilishi kerak. Marokashliklar hozircha bitta avtogol o‘tkazib yuborgan.
Jahon chempionatida 4 ta gol bilan Lionel Messi ham to‘purarlikka davogarlik qilmoqda. Biroq argentinalik futbolchi fransuzlardan farqli o‘laroq, o‘yindan bor-yo‘g‘i ikki marta gol urdi. Saudiya Arabistoni bilan bo‘lgan guruh bosqich o‘yinida va Niderlandiyaga qarshi chorak final bahsida penaltidan gol urdi. Katta ehtimol bilan Messi, Jiru va Mbappega yetolmaydi. Jahon chempionatida o‘ynashni davom ettirayotgan eng yaqin taʼqibchilar ikkitadan gol urishdi. Ular argentinalik Julian Alvares, xorvatiyalik Andrey Kramarich va marokashlik Yussef En-Nesiridir.
Mbappega bitta gol urish uchun atigi 77 daqiqa kerak bo‘ldi. Jiruda esa bu statistika 79 daqiqani tashkil etadi. Messiga raqiblar darvozasini ishg‘ol qilish uchun 120 daqiqa kerak bo‘ldi. Qizig‘i shundaki, Messi jahon chempionatida zarbalar soni bo‘yicha peshqadam: Leo raqiblar darvozasiga 25 marta zarba bergan. Mbappeda 21 ta, Jiru va Neymarda esa 13 tadan. Gol urish imkoniyatlari bo‘yicha Messi va Mbappe qolganlardan sezilarli o‘zib ketishdi. Ular 17 ta zarbadan bitta gol urishga erishgan. Jiruda bu ko‘rsatkich 12 ta.
Mbappe so‘nggi jahon chempionatining to‘purarlaridan o‘tib ketish uchun yuqori imkoniyatga ega. Keyn JCH-2018ning eng yaxshi to‘purari bo‘lgan. O‘shanda futbolchi oltita gol urgan. Bungacha Xames Rodriges JCH-2014da, Miroslav Kloze 2006 yilgi jahon chempionatida va 2010 yilgi jahon chempionatida 6 ta gol urgan edi. Fransiyalik Jyus Fontenning 1958 yilgi jahon chempionatidagi 13 ta gollik rekordi uzoq vaqt saqlanib qolishi mumkin. Mbappe JCH-2002da Yaponiya va Koreyaga sakkizta gol urgan braziliyalik Ronalduning natijasiga ham yetishi dargumon.