БААда йирик ЙТҲ: 14 киши ҳалок бўлди, 30 киши жароҳатланди
Тўқнашувдан сўнг бошланган ёнғин бошқа транспорт воситаларига ҳам тарқалган.
Бирлашган Араб Амирликларининг Фужайра амирлигида юк машинаси ва бир нечта автомобиль иштирокида содир бўлган йўл-транспорт ҳодисаси оқибатида 14 киши ҳалок бўлди, яна 30 киши жароҳатланди. Тўқнашувдан кейин транспорт воситаларида ёнғин ҳам юзага келган.
Фужайра полицияси маълумотига кўра, ҳодиса пайшанба куни ярим тунга оз вақт қолганда Шайх Халифа бин Зоид автомобиль йўлида, Фужайра шаҳрига кириш қисмида содир бўлган.
Дастлаб юк машинаси ҳайдовчиси бошқарувни йўқотиб, бошқа транспорт воситасига урилган. Шундан сўнг юк машинаси ағдарилиб, тирбандлик сабабли тўхтаб турган бир нечта автомобиль билан тўқнашган. Тўқнашув ортидан юк машинасида ёнғин чиққан ва аланга шикастланган бошқа транспорт воситаларига ҳам тарқалган.
Полиция хабарига кўра, жароҳатланганларнинг 15 нафари шифохонадан жавоб берилган, қолган 15 нафари даволанишни давом эттирмоқда. Ҳалок бўлганлар орасида БАА фуқаролари ҳам бор. Айрим қурбонларнинг шахсини аниқлаш учун ДНК экспертизаси ўтказилмоқда.
Ҳодиса жойига фавқулодда вазиятлар хизмати, фуқаро муҳофазаси бўлинмалари, тез ёрдам ва полиция ходимлари жалб қилинган. Улар ёнғинни ўчирган, жароҳатланганларни шифохоналарга олиб борган ҳамда ҳудуд хавфсизлигини таъминлаган.
