Осиё кубоги кечиктирилди: турнир қачон ўтказилади?
Бунга минтақадаги вазият, логистика қийинчиликлари ва транспортдаги узилишларни сабаб қилиб кўрсатди.
Осиё футбол конфедерацияси Саудия Арабистонида ўтказиладиган 2027 йилги Осиё кубоги саналари ўзгартирилганини эълон қилди. Мусобақа аввал 2027 йил 7 январдан 5 февралгача ўтказилиши керак эди. Янги қарорга кўра, турнир 2027 йил 23 декабрда бошланиб, 2028 йил 21 январда якунланади.
ОФК 3 ноябрь куни эълон қилган баёнотида қарор Саудия Арабистони футбол федерацияси ва мусобақанинг маҳаллий ташкилий қўмитаси билан ўтказилган батафсил муҳокамалардан кейин қабул қилинганини билдирди.
Конфедерация мусобақани кечиктиришга минтақадаги фавқулодда вазият, логистика билан боғлиқ мураккабликлар ва саёҳатдаги узилишлар сабаб бўлганини маълум қилди. Янги саналар тасдиқланиши учун FIFAга тақдим этилади.
Мусобақа Саудия Арабистонининг Ар-Риёд, Жидда ва Ал-Хобар шаҳарларидаги саккизта стадионда ўтказилиши режалаштирилган. Унда 24 та терма жамоа қатнашади. Бу Осиё кубогининг 19-мавсуми бўлади.
Мусобақада 24 та терма жамоа иштирок этади. Амалдаги Осиё кубоги соҳиби — Қатар терма жамоаси.
Эслатиб ўтамиз, 2026 йилнинг октябрь ойи охирида ОФК ва маҳаллий ташкилий қўмитаси мусобақанинг барча учрашувлари учун бошланиш вақтларини ҳамда стадионларни тасдиқлаган эди. Ўшанда турнирнинг очилиш учрашуви 2027 йил 7 январь куни Саудия Арабистони ва Фаластин терма жамоалари ўртасида ўтказилиши белгиланган эди.
