Наманганда кўчага чиқинди ташлаганлар жазоланди

Экология вазирлиги Диспетчерлик ва онлайн мониторинг марказий бошқармаси томонидан Наманган вилоятида ўрнатилган онлайн кузатув камералари орқали белгиланмаган жойга чиқинди ташлаш билан боғлиқ бир қанча ҳуқуқбузарликларга чора кўрилди.

 

Хусусан, Наманган шаҳри «Илғор» МФЙ ҳудудида ҳуқуқбузар томонидан ноқонуний жойга чиқинди ташлангани аниқланди. Унга нисбатан МЖтКнинг 91-модда 1-қисми билан баённома расмийлаштирилиб, БҲМнинг 3 баробари — 1 миллион 20 минг сўм миқдорида жарима белгиланди.

 

Шунингдек, Наманган шаҳри «Илғор» МФЙ, «Сардоба» МФЙ, " Исфарҳон" МФЙ, «Ҳақиқат» МФЙ ҳудудларида ҳам фуқаролар томонидан белгиланмаган жойларга чиқинди ташлангани маълум бўлди. Ҳуқуқбузарлар аниқланиб, уларга нисбатан МЖтК 91прим 1-моддаси 1-қисми билан маъмурий баённома расмийлаштирилди. Ҳар бир ҳуқуқбузарга БҲМнинг 1 баробари — 340 минг сўмдан жарима тайинланди.

 

Маълумот учун, онлайн кузатув камераларини республиканинг барча ҳудудларида ўрнатиш режалаштирилган. Бу камералар нафақат ноқонуний чиқинди ташлаш, балки бошқа турдаги экологик ҳуқуқбузарликларни ҳам аниқлашга ва ўз вақтида чора кўришга имкон беради.