Фирибгарлик ҳақида хабар тушиши билан чора кўрилади: Ўзбекистонда 24/7 марказ ташкил этилади
У орқали киберфирибгарлик ҳақида хабар келиши билан пул ҳаракати кузатилиб, тезкор чоралар кўрилади.

Ўзбекистонда кибержиноятчилик, гиёҳвандлик ва одам савдосининг олдини олиш чоралари кучайтирилади. Бу президентнинг 10 ноябрда имзоланган ПФ-242-сон фармонида белгиланган.
Ҳужжатга кўра, 2026 йил декабрга қадар норматив-ҳуқуқий ҳужжат лойиҳаси ишлаб чиқилади. Унда Ички ишлар вазирлиги ва банклар иштирокида 24/7 режимида фаолият юритадиган марказ ташкил этиш кўзда тутилган.
Марказ орқали кибермаконда фирибгарлик ёки ўғрилик юзасидан хабар келиши билан пул маблағлари ҳаракатини кузатиш ва тезкор чоралар кўриш механизми жорий этилади.
Шунингдек, одам савдосидан жабрланганларга ёрдам кўрсатиш тартиби ҳам такомиллаштирилади. Жумладан, жабрланувчининг ёрдам олиши учун якуний идентификация ёки шахсий режа тасдиқланишини кутишига йўл қўйилмайди.
Уни аниқлаган масъул шахс зиммасига дарҳол хавфсиз жой, тиббий ёрдам ва таржимон хизматини тақдим этиш мажбурияти юкланади. Ёрдамнинг ўз вақтида етиб боришини назорат қилиш механизмлари ҳам кучайтирилади.
Белгиланган вазифалар ижроси учун Ички ишлар вазирлиги, Давлат хавфсизлик хизмати, Бош прокуратура, Рақамли технологиялар вазирлиги ҳамда тегишли комиссиялар масъул этиб белгиланган.








