Ўзбек ва тожик киноижодкорлари томонидан “Жомий ва Навоий” фильми суратга олинади

 

Ўзбекистон Кинематография агентлиги ва  “Тожикфильм” давлат муассасасининг “Жомий ва Навоий” тарихий фильмини яратиш бўйича тузилган қўшма комиссиясининг якуний йиғилишида фильм концепцияси икки давлат мутахассислари томонидан маъқулланди.

Мазкур фильм Жомий ва Навоий дўстлиги ҳақида бўлиб, икки давлат ўртасида дўстлик ва самимийлик, ўзаро ҳамжиҳатлик ва ҳамкорлик муҳитини қайта тиклашга хизмат қилади.

Тақдимотда Кинематография агентлиги Бош директори Фирдавс Абдухолиқов, Тожикистон Республикасининг Ўзбекистондаги Фавқулодда ва мухтор элчиси Абдужаббор Раҳмонзода, “Тожикфильм” давлат муассасаси директори Маҳмасаид Шохиён, шунингдек, икки давлат олимлари ва киноижодкорлари иштирок этди.

Ўзбекистон томонидан фильмга режиссёрлик қилаётган Фурқат Усмоновнинг таъкидлашича, Кинематография агентлиги бош директории Ф.Абдухолиқов Тошкент кинофестивали доирасида таниқли актёр Люк Бессон билан музокара ўтказган.

 

“Яқинда бўлиб ўтган Zoom-конференция давомида Люк Бессон Ўзбекистон ва Тожикистон ёш режиссёрлари билан ҳамкорлик қилиш истагини билдирди ва ёш ўзбек киноижодкорларининг иштиёқидан илҳомланганлигини таъкидлаб ўтди. Келишувларга кўра, сценарий устида биргаликда ишлаймиз, у лойиҳа бўйича маслаҳатчи вазифасини бажаради. Ҳозирда у фильм сценарийсини интиқлик билан кутмоқда”, — деди Усмонов.