Hujjat loyihasiga ko‘ra, jami 61 ta bozor, jumladan, Toshkent shahridagi 20 ta bozor va savdo komplekslari “hammasi bir joyda” tamoyili asosida savdo majmualarini tashkil etish tajribasi ko‘rib chiqiladi.
Istiqbolda O‘zbekistondagi bozor va savdo komplekslari ustav kapitalidagi davlat aksiya paketlari (ulushlari)ni bosqichma-bosqich sotuvga qo‘yiladi.
Bu boradagi hujjat loyihasi muhokama uchun eʼlon qilindi. Shuningdek, ulardan jami 12 bozor va savdo kompleksi tugatiladi.
Maʼlumot o‘rnida: Sirdaryodagi bir nechta bozorlar sotuvga qo‘yiladi. Bu bo‘yicha Vazirlar Mahkamasining tegishli qarori normativ-huquqiy hujjatlar loyihalari muhokamasi portaliga joylashtirildi.
Toshkent shahrida sotuvga qo‘yiladigan bozorlar qatorida Parkent universal savdo kompleksi, Yangiobod ixtisoslashgan bozori, Qoraqamish dehqon bozori, Yunusobod dehqon bozori, O‘rikzor savdo kompleksi, Qo‘yliq dehqon bozori, Chorsu buyum savdo komleksi, Oloy dehqon bozori va Bek to‘pi savdo kompleksi ham bor. Shuningdek, Guliston shahridagi “Guliston dehqon bozori” MCHJ, Mirzaobod tumanidagi “Navro‘z avto ulovlar sotish bozori” MCHJ va Sirdaryo tumanidagi “Baxt-X” MCHJlar ham ro‘yxatga kiritilgan.
Qayd etilishicha, bozor va savdo komplekslaridagi davlat ulushlarini sotish shartlari va usullari davlat mulkini sotishda tender savdolarini o‘tkazish bo‘yicha davlat komissiyasi qaroriga asosan belgilanadi.
Loyihaning maqsadi sotishdan tushgan mablag‘larning respublika byudjetiga taqsimlanadigan qismi, istisno tariqasida, Qoraqalpog‘iston Respublikasi byudjetiga, viloyatlar va Toshkent shahrining mahalliy byudjetlariga hamda obyekt joylashgan tuman (shahar) mahalliy byudjetiga teng ulushlarda yo‘naltiriladi.
Bundan tashqari, ustav kapitalidagi davlat aksiya paketlari (ulushlari) sotilgunga qadar bozor va savdo komplekslari tomonidan ularning mol-mulklarini sotish, yirik bitimlar tuzish, aktivlarini garov taʼminoti sifatida va boshqa tarzda tasarruf etish taqiqlanadi.
Eslatib o‘tamiz, avvalroq O‘zbekiston bozorlaridagi narx-navo maʼlum qilingani va isteʼmol bozoridagi tovarlar va xizmatlar o‘rtacha 0,2 % ga arzonlashgani haqida xabar berilgandi.
Cho‘lponoy Ahmedova